Bai mundu berria irakurle klubean

— Gure mundua ez delako Oteloren mundua. Ez zegok kotxeak egiterik, altzairu gaberik. Ez zegok tragediak sortzerik, egongaiztasun sozial gaberik. Gaur mundua egonkorra duk. Jendea zoriontsu duk. Nahi duen guztia zeukak eta eduki ez dezakeenik ez dik inoiz desiratzen. Gustora zegok; salbu zegok; inoiz ez zegok gaixorik; ez duk heriotzaren beldur; grina eta zahartzea zer diren ere ez zekik. Ez zegok emazterik, ez seme alabarik, ez amodio sendoegirik. Gure jendea egokiturik dagoen bezala egonik, ezin zezakek obratu, obra dezakeen moduan baizik. Eta okerrik gertatuko balitz, hor zegok soma beti. Hik, Mr. Basati, libertatearen izenean leihotik behera jaurtiki duan soma, hain zuzen. Libertatea! —Inspektoreak barre-karkara bat bota zuen—. Pentsatzea ere Deltek ba dezaketela libertadea zer den jakin! Eta ba dezaketela Otelo konpreni! Baina mutil!

Basatia ixilik egon zen apur batean

— Hala ere —ekin zion temati— Otelo ona duzu, Otelo hobea duzu sentsoramako pelikula horiek baino.

— Hala duk, noski —baieztatu zuen Inspektoreak—. Baina horixe duk egonkortasunaren truke ordaindu behar dugun prezioa. Bietarik bat hautatu beharra zegok, edo zoriona, edo jendeak behinola zioen arte bikain hura. Guk arte bikaina bazter utzi diagu. Eta sentsorama eta lurrin organoa jarri dizkiagu haren ordez.

Bai mundu berria, Aldous Huxley.

Oso ezaguna den idazlan batekin korapilatuko gara hilabete honetan. George Orwellek idatzitako 1984 obrarekin batera, agian gizartearen geroa irudikatzen saiatu den distopiarik ezagunetarikoa dugu Aldous Huxleyk orain dela laurogei urte baino gehiago idatzi zuen Bai mundu berria.

Distopia, grekoaren dis (txarra) eta tópos (lekua) hitzetatik eratorritako hitz-elkartea litzateke eta ezezko-utopia edo antzeko esanahia izango zukeen. Beraie buruz gehiago jakiteko, ez dago hoberik Unai Break (@unaibrea) Argian idatziriko artikulua baino.

Xabier Amurizak itzulita (bere azalpena Anaitasuna aldizkarian) liburu honek bestelako garrantzia izan du, batez ere egileak gizartearen norabidea aurreikusten izan zuen abileziagatik (kontuan izan DNAren egituraren ikerketei ez zitzaiela liburua argitaratu eta hogei urtera arte hasierarik eman, beraz, sexu gabeko ugalketaren kontua burutazio hutsa baino ezin zitekeen izan). Nahiz eta irakurtzen gauden bertsio zaharrago batean oinarrituta, liburua osoan duzue Armiarmaren gunean eta berari buruzko informazio gehiago duzue Wikipedian.

Liburuari buruzko haria ireki dugu LITforoan.

Klubeko bilera, hilabetearen hirugarren eguaztenerako (apirilak 16) aurreikusita dago, baina Aste Santuko oporrak direla eta arazorik balego, jar zaitezte gurekin harremanetan eta beste egun bat adostu genezake. Bestela, badakizue, hemerotekan arratsaldeko zazpi t´erdietan (19:30).

Eguneraketa (2014-04-14)
Aste Santuko oporren bezpera dela eta, irakurle taldekideok bilera atzeratzea adostu dugu. Leku eta ordu berean baina apirilak 30 dituenean izango da liburuari buruz berba egiteko bilera, beraz.