Kultur Leioa Liburutegia: Juul sariak 2021

Ostegunean (ira. 23) ospatu zen Nafarroako Ikastolen Elkarteak antolatzen duen aurtengo Juul kanpainaren sari-banaketa (beraien YouTubeko kanalean 31. minututik aurrera).

Gregie de Mayer idazlearen eta Koen Vanmechelen eskultorearen arteko elkarlanetik sortutako pertsonaia hunkigarri honen izena hartzen duten sari literario hauek ikastoletako ikasleek aukeratzen dituzte. Horretan datza Juul sarien garrantzia, irakurleen gomendio zuzenetan oinarritzen direla.

Zio gomendatzaile honi jarraituz, aurtengo sariak irabazi dutenen lanekin erakusketa bat antolatu dugu liburutegiko Haur-Gazte atalean (zerrenda osoa pdf formatuan).

Honako hauek izan dira saritutakoak:

3-6 urte

Hiru begiko igela, Olga de Dios (itz. Ipar Alkain)

Hiru begiko igela leku kutsatu batean hazi da. Jauzi handiak egiten ditu gertatzen dena ulertzeko. Laster jakingo du gauzak aldatu nahi dituela. Lortuko duzu bakarrik egitea? Irtenbide komunak bilatzearekin ilusionatzeko ipuin bat.

Polita, Canizales (itz. Ipar Alkain)

Kaixo, Sorgina naiz. Oso pozik nago hitzordu bat dudalako. Nik oso polita ikusten dut neure burua, baina denek ez dute gauza bera pentsatzen. Aholkuak ematen dizkidate eta ez dakit zer egin. Arrazoi izango dute? Besteei gustatzea eta aldi berean ongi sentitzea posible al da?

Boskotea ohean, Marie-France Painset (ir. Atelier Saje; itz. Patxi Zubizarreta)

«Bost ziren, bost, ohean. Haietako bat mugitu ostean, geratu zen, plost!, lurrean». Marie-France Painset (Calais, 1965) frantziarra da, eta sehaska kantetan, haur errimetan eta irakurle txikientzako ipuinetan dago espezializatuta. Urteetan zehar, kale liburutegietako animatzailea izan zen.

6-8 urte

Etxe honetan, Aintzane Usandizaga (ir. Gaston)

Etxean arauak jartzera ohituta dagoen aitatxi baten eta honen egunerokotasuna eta errutina hankaz goiti paratzera datorren ilobaren arteko harremana da gaia. Edonori ezagunak egin ahal zaizkigun egoerak bizitasunez kontatu eta marraztu dituzte autoreek, umorea maisuki erabiliz eta irribarrea lehen minututik sorraraziz. Irakurleak erabaki dezala nork agintzen duen Etxe honetan.

Katta ametsetan, Miren Agur Meabe (ir. Lotura Films)

Udaberriarekin batera, basoa kolore berriz jantzi da. Neguko lozorrotik irtenda, Katta, inguruak miatzeko gogoz, zuhaitzera igo eta ia iritsi da zeruraino. Amets batean bezala hegaldatuko da lainoetan eta, etxera itzultzean, udaberriak garai berri baten zantzuak ekarri dizkiola konturatuko da.

Otsoko eta etxerako bidea, Rachel Bright (ir. Jim Field; itz. Amets Santxez)

Otsokok, taldeko gazteenak, beste etxe baten bila irten behar du, taldeko gainerako otsoekin batera. Otsokoa ziur dago nahiko nagusia dela, dagoeneko, baita bere buruaren gidari izateko ere. Hala ere, zeharkaldi luze bat dela eta, Otsoko atzean geratu da, eta tundra artikoko animalien laguntzarekin baino ez da izango gai bere bidelagunengana itzultzeko.

8-10 urte

Onin eta Afrikarako bidaia, Ibon Martin (ir. Emmmanuel Montiel; itz. Aiora Jaka)

Cousteau arrano arrantzaleari lagundu behar diogu bere neguko migrazioan. Hegaldi honek, Urdaibaiko paduretatik abiatuta, leku zoragarrietara eramango gaitu: Marrakex hirira, basamortuko oasi batera, ur arrosa duen aintzira batera… Bidean, tximino lapur batekin lehiatu beharko dugu, eta krokodilo goseti batzuei aurre egin. Sinestezina, ezta?

Lapatza, Paddy Recalde (ir. Jokin Mitxelena)

Garazik, itsasertzean bakarrik dabilela, arrautza berezi bat aurkitu du. Bere txabolara, Itsas Base Sekretura eramango du. Handik gutxira jaioko da txorikume bat. Zailtasun guztien gainetik, zaintzea erabaki du, Garazik beti egiten baitu aurrera. Ardura berri hau ikasgai garrantzitsua bihurtuko da neskatilarentzat.

Txomintxo eta Perutxo lehendakari, Txomin eta Peru Magdalena (ir. Iosu Mitxelena)

Astelehen goiza da eta Txomintxo eta Perutxoren ikasgelakoak Gasteizera doaz autobusean. Gaurkoan bisita berezia dute: Eusko Legebiltzarra. “Legebiltzarrean, helduek bozkaz hautatutako legebiltzarkideak egoten dira”, azaldu die Txoxe maisuak. “Eta zer egiten dute han legebiltzakideek?”, galdetu du Urtzik. “Legeak egin, denon dirua zertan gastatu eztabaidatu, jaiegunak noiz jarri erabaki… gauza asko!”. Txomintxo eta Perutxori ez zaie batere lan zaila iruditu.

10-12 urte

Maddiren amona influencerra, Jasone Osoro (ir. Alai Zubimendi)

Covid19 malapartatuak mundu osoa astindu du. Maddiren gurasoak Maldivar irletan harrapatu ditu oporretan, eta etxera itzuli ezinik daude; ondorioz, Maddik amonaren etxean pasatu beharko du itxialdia. Hasiera batean aspergarria zirudien plana sorpresaz eta abenturaz beterikoa izango da.

Ihesaldia (Gizajo baten egunkaria; 12), Jeff Kinney (itz. Miren Arratibel)

Heffleytarrek, hotzetik eta Gabonetako tirabiretatik aldendu nahian, ihesaldi bat egiten dute uharte tropikal batera, ongi merezitako atsedenaldi baten bila. Ziur daude ikaragarri ongi etorriko zaiela egun batzuk ametsezko paraje batean pasatzea!

Burnizko potoa, Antton Kazabon (ir. Jokin Mitxelena)

Artikutzako Gamio etxean gizon bat azaldu da hilzorian. Aizkoraz jotako zauri latz bat darama petxoan.Artikutzako meatzarien artean, azkar zabaldu da gizon hori Berdafiyo baserrikoarekin tratutan ibiltzen den Trabuko bandidoa dela.

12-16 urte

Beti Iparralderantz, Jon Arretxe (ir. Cristina Fernandez) (eLiburutegian)

Aita Europa aldera joan zen ogi bila, afrikar asko bezala. Baina haren berririk ez zuenez, hamahiru urte bete zituenean, Drissa aitaren bila abiatuko da milaka kilometroko bidaian, milaka abentura zirraragarri bizi izatera. Hainbat muga zeharkatu beharko du beti iparralderantzko bidean

Miñan, Amets Arzallus eta Ibrahima Balde (eLiburutegian)

Ibrahima kamioi batean zebilen aprendiz Ginean, egun batean amak deitu zuen arte: anaia txikia falta zen etxean. Eta haren bila abiatu zen. Basamortua gurutzatu; pasatzaile, polizia, bahitzaileekin topo egin; egarria, gosea, mina ezagutu. Afrikatik Europarako bidea. Mediterraneoa zeharkatzen dutenak deshumanizatzea ezinbestekoa da haien heriotzen, kanporatzeen, ilegalizatutako bizitzen gaineko ezaxola zabaltzeko. Baina bizitza horietako bakoitza bakarra da eta, beraz, unibertsala

Eskularru Beltzak, Jasone Osoro (ir. Josevisky) (eLiburutegian)

Beire ingelesa ikasteko udaleku batera bidali dute gurasoek. Bere institutuan gelako liderra den arren, udalekuan inork ez du aintzat hartzen, eta Baba izeneko mutil misteriotsu batengan aurkituko du babesa, boxeoa ikasteaz gainera. Etxera itzulita, bere betiko lagun Kar eta Leterekin batera, hirurek osatzen duten Sua taldea prest dago, berriz ere, institutuko izarrak izan eta egurra emateko, baina badirudi aurtengo ikasturtean gauzak desberdinak izango direla